Бүгін Астана қаласындағы Бейбітшілік және келісім сарайында Медицина қызметкерлері күніне арналған салтанатты іс-шара өтті. Сала мамандарының кәсіби мерекесі аясында ана мен бала денсаулығын сақтау жолында аянбай еңбек етіп жүрген үздік медициналық ұйымдар марапатталды.
Республикалық байқаудың қорытындысы бойынша Түркістан облысының екі іргелі мекемесі жоғары нәтиже көрсетіп, «Беделді» атағына ие болды:
«Беделді перзентхана»номинациясы бойынша — Түркістан облыстық №1 перинаталдық орталығы.
«Беделді балалар ауруханасы» номинациясы бойынша — Түркістан қалалық балалар ауруханасы.
Бұл марапаттар — өңірдегі медициналық көмек сапасын арттыруға, заманауи диагностика мен емдеу әдістерін енгізуге қосқан сүбелі үлестің және ұжымдардың күнделікті қажырлы еңбегінің нәтижесі.
Түркістан облыстық денсаулық сақтау басқармасы атынан әріптестерімізді кәсіби мерекелерімен және қол жеткізген жоғары жетістіктерімен шын жүректен құттықтаймыз! Ел денсаулығын сақтау жолындағы жауапты қызметтеріңізде табыс, отбасыларыңызға амандық тілейміз.