Тақырып: Президент Alem.ai жасанды интеллект орталығының жұмысымен танысты
Мемлекет басшысы Қасым-Жомарт Тоқаев Alem.ai халықаралық жасанды интеллект орталығын аралап көрді.
Орталықта жасанды интеллект саласындағы ғылыми зерттеулер мен білім беру бағдарламалары жүзеге асырылып, стартап-бастамалар мен түрлі қолданбалы шешімдерді енгізуге жағдай жасалған. Іске асырылып жатқан жобалар ЖИ технологияларын мемлекеттік секторда, бизнесте және күнделікті өмірде кеңінен қолдануға мүмкіндік береді.
Жалпы, аталған орталық Қазақстанды технологиялық, заманауи әрі бәсекеге қабілетті елге айналдыруға бағытталған стратегиялық міндеттерді іске асыру мақсатында құрылған.
Президент орталықты аралау барысында Astana Smart City жобасының іске қосылуына куә болды. Бұл жоба интеллектуалды қала инфрақұрылымының жаңа буынын қалыптастыруға бағытталған маңызды бастама болып табылады.
Сонымен қатар, Томас Прамотедхам қала жүйелері мен деректерді нақты уақыт режимінде біріктіретін бірыңғай AI-платформаны таныстырды. Аталған шешім қаланы басқару тиімділігін арттыруға және цифрлық инфрақұрылымды дамытуға мүмкіндік береді.