Түркістан қалалық Полиция басқармасының Жергілікті полиция қызметкерлері ішкі істер органдарының есебінде тұрған балаларға ата-аналарының рұқсатымен қалалық полиция ғимаратында экскурсия ұйымдастырды.
Экскурсия барысында жасөспірімдер уақытша ұстау изоляторы мен әкімшілік қамау орындарын аралап, олардың қызметімен танысты. Полицейлер балаларға заң мен тәртіпті сақтау, өз әрекеттеріне жауапкершілікпен қарау және құқық бұзушылықтың салдары туралы жан-жақты түсіндірді.
Іс-шараның негізгі мақсаты – кәмелетке толмағандар арасында құқық бұзушылықтардың алдын алу, ойланбай жасалған іс-әрекеттердің зардабын көрсету және құқықтық сауаттылықты арттыру.
Полицейлер жасөспірімдерге әрбір қадамды ойланып жасау қажеттігін айтып, олардың көкейінде жүрген сұрақтарына жауап берді.
Айта кетейік, жыл басынан бері түрлі құқық бұзушылық жасағаны үшін ішкі істер органдарының есебіне 130-ға жуық кәмелетке толмаған жасөспірім тіркелген. Қазіргі таңда олармен тәрбиелік және профилактикалық жұмыстар тұрақты түрде жүргізілуде.