Түркістан қаласында интернет-алаяқтықтың алдын алу және азаматтардың құқықтық сауаттылығын арттыру мақсатында кең көлемді түсіндірме жұмыстары жүргізілді.
Шараны Түркістан қалалық полиция басқармасының қызметкерлері ұйымдастырды. Тәртіп сақшылары тұрғындарға интернет кеңістігінде жиі кездесетін алаяқтық тәсілдерін түсіндіріп, жеке деректерді қорғаудың маңыздылығына назар аударды.
Кездесу барысында полицейлер азаматтарға бейтаныс тұлғалардан келген күмәнді хабарламаларға жауап бермеу, жалған интернет-дүкендер мен инвестициялық платформаларға сенбеу, сондай-ақ банк картасының нөмірі мен құпия кодтарын ешкімге бермеу қажеттігін ескертті.
Сонымен қатар, әлеуметтік желілер мен мессенджерлерде таралатын күмәнді сілтемелерге өтпеу, тек ресми және тексерілген дереккөздерге жүгіну ұсынылды.
Полиция қызметкерлері тұрғындарға нақты мысалдар келтіре отырып, киберқылмыскерлердің азаматтарды алдау тәсілдері жылдан жылға жетіліп келе жатқанын атап өтті. Қазіргі таңда интернет-алаяқтық Қазақстан бойынша кең тараған қылмыс түрлерінің бірі болып саналады.
– Әр азамат өз қауіпсіздігіне бейжай қарамауы тиіс. Күмәнді хабарламалар мен ұсыныстарға сенбеу арқылы өзіңді және қаржыңды қорғауға болады. Ең бастысы – ешқашан жеке деректерді, банктік ақпаратты бөгде адамдарға бермеу, – деді Түркістан қалалық полиция басқармасының өкілдері.
Тәртіп сақшылары тұрғындарды қырағылық танытуға, киберқылмысқа жол бермеуге және алаяқтарға алданбауға шақырды. Сонымен қатар, алаяқтық деректері бойынша бірден 102 нөміріне немесе «102» мобильді қосымшасы арқылы хабарлау қажеттігі еске салынды.
Мұндай профилактикалық жұмыстар алдағы уақытта да жалғасады. Полицейлердің айтуынша, бұл бағыттағы түсіндіру іс-шаралары қоғамның ақпараттық қауіпсіздігін арттыруға және азаматтардың цифрлық мәдениетін қалыптастыруға сеп болады.