Жаңа Конституция жобасында адам құқықтары мен бостандықтарын қорғауға ерекше мән берілген. Құжатта азаматтардың заң алдындағы қорғалуын қамтамасыз етуге және құқықтық кепілдіктерді нығайтуға бағытталған бірқатар маңызды нормалар қамтылған.
Атап айтқанда, жаңа редакцияға сәйкес азамат ұсталған жағдайда оған ұстаудың себептері мен өзінің құқықтары міндетті түрде түсіндірілуі тиіс. Бұл қағида халықаралық құқықтық тәжірибеде кеңінен қолданылатын негізгі стандарттардың бірі болып табылады және адамның конституциялық құқықтарын қорғауға бағытталған.
Сонымен қатар, Конституция жобасында әрбір азаматтың өз құқықтары мен бостандықтарын заңмен тыйым салынбаған барлық тәсілдер арқылы қорғауға құқығы бар екені нақты көрсетілген. Бұл норма азаматтарға сотқа жүгіну, заң көмегін алу және өзге де құқықтық тетіктерді пайдалану мүмкіндігін береді. Сондай-ақ қажетті қорғаныс құқығының сақталуы да конституциялық деңгейде бекітіледі.
Жобаға енгізілген маңызды қағидалардың бірі – бір құқық бұзушылық үшін адамды қайтадан жауапқа тартуға жол бермеу. Бұл құқықтық мемлекеттің негізгі принциптерінің бірі саналады және әділ сот төрелігін қамтамасыз етуге қызмет етеді.
Мамандардың пікірінше, азаматтардың құқықтары мен бостандықтарын қорғауға бағытталған мұндай нормалардың Конституцияда нақты бекітілуі құқықтық кепілдіктерді күшейтіп, заң үстемдігін нығайтуға және қоғамдағы әділеттілікті қамтамасыз етуге ықпал етеді.