Аудан әкімі Серік Үсенұлы Мамытовтың тапсырмасына сәйкес «Дүниежүзілік қоршаған ортаны қорғау күні» аясында ауқымды сенбілік ұйымдастырылып, тазалық пен экологиялық мәдениетті қалыптастыруға бағытталған кең көлемді жұмыстар атқарылды.
Қала, кент және барлық ауылдық округтерде өткен тазалық шарасына мемлекеттік және квазимемлекеттік мекеме қызметкерлері, аудан жастары, кәсіпкерлер, экобелсенділер мен тұрғындар белсенді қатысып, қоршаған ортаны таза ұстау – әрбір азаматтың міндеті екенін іс жүзінде көрсетті.
Сенбілік барысында республикалық, облыстық және аудандық маңызы бар автомобиль жолдарының бойлары, елді мекендердің ішкі көшелері, саябақтар мен скверлер, көпшілік жиі жүретін қоғамдық орындар тұрмыстық қалдықтардан тазартылды. Сонымен қатар, жол жиектері мен арық-атыздар ретке келтіріліп, шөптері шабылып қоршаған ортаның көркін арттыруға бағытталған жұмыстар жүргізілді.
«Экологиялық жұмыстардың басты мақсаты – табиғатты қорғау мәдениетін қалыптастыру, тұрғындарды тазалық сақтауға шақыру және туған өлкенің табиғи келбетін жақсарту. Бұл бағыттағы жұмыстар аудан көлемінде жүйелі түрде жалғасып, тұрғындардың қоршаған ортаға деген жауапкершілігін арттыруға ықпал етуде» дейді аудан басшысы.
Таза орта – халық денсаулығы мен жайлы өмір сүрудің кепілі. Сондықтан, табиғатты аялау мен тазалықты сақтау әрбір азаматтың күнделікті өмір салтына айналуы тиіс. Аудан тұрғындарының белсенділігі мен ауызбіршілігі бұл бастаманың маңызын тағы бір мәрте айқындап берді.