Республикалық референдум күні Түркістан облысында «Отбасымызбен дауыс береміз!» акциясы ұйымдастырылып, тұрғындар отбасымен бірге дауыс беру учаскелеріне келіп, өз таңдауларын жасауда. Бастаманың негізгі мақсаты – азаматтардың саяси белсенділігін арттыру және жас ұрпаққа ел болашағына жауапкершілікпен қараудың маңызын көрсету.
Акция аясында Жетісай ауданындағы №224 дауыс беру учаскесіне аудан тұрғыны Халым Тұрсынов отбасы мүшелерімен бірге келіп, азаматтық борышын орындады. Оның айтуынша, мемлекет дамуына қатысты маңызды шешімдер қабылданатын кезеңде әрбір азаматтың қатысуы маңызды.
– Мұндай маңызды саяси науқанға қатысу – әрбір азаматтың міндеті. Біз отбасымызбен бірге келіп дауыс беру арқылы балаларымызға да ел тағдырына бейжай қарамаудың үлгісін көрсеткіміз келеді. Әрбір отбасының таңдауы – мемлекет болашағына қосылған үлес, – деді ол.
Айта кетейік, Жетісай ауданында республикалық референдум өткізу үшін 72 дауыс беру учаскесі жұмыс істеп тұр. Ауданда 102 510 азамат дауыс беру құқығына ие.
Жалпы, Түркістан облысында 1 187 257 азамат референдумда дауыс беру құқығына ие. 15 наурыз күні таңғы сағат 07:00-ден бастап өңір бойынша 947 референдум учаскесі жұмыс істеп, тұрғындар маңызды саяси науқанға белсенді қатысып жатыр.