Түркістан облысында референдум күні дауыс беруге келген тұрғындар үшін бірқатар учаскелерде кітап көрмесі мен қолөнер шеберлерінің жәрмеңкесі ұйымдастырылды. Іс-шараның басты мақсаты – ұлттық құндылықтарды дәріптеп, тұрғындарға ерекше рухани әрі мәдени атмосфера қалыптастыру.
Жәрмеңкеде қазақы нақыштағы ағаш және тоқыма бұйымдары, ұлттық қолөнер туындылары көпшілік назарына ұсынылды. Сонымен қатар, киіз үй маңына құрақ көрпелер төселіп, ұлттық нақыштағы безендірулер келушілерге ерекше әсер сыйлады.
Ал кітап көрмесінде ел тарихы, мәдениеті мен рухани мұрасына арналған түрлі әдебиеттер қойылып, дауыс беруге келген азаматтардың қызығушылығын арттырды.
Айта кетейік, Түркістан облысында 947 референдум учаскесі жұмыс істеуде. Өңірде 1 187 257 азамат дауыс беру құқығына ие. Бұл облыс халқының 55,4 пайызын құрайды.