Түркістан облысында халықты жұмыспен қамту және тұрақты еңбек орындарын құру бағытындағы жұмыстар жүйелі түрде жүргізіліп келеді. Мемлекет басшысы Қасым-Жомарт Тоқаевтың тапсырмаларын орындау және ұлттық жобалар аясында өңірде биыл 120 мыңнан астам жаңа жұмыс орнын құру көзделген. Оның ішінде 60 пайыздан астамы – тұрақты жұмыс орындары болмақ.
Бұл жұмыстар «Өңірлік жұмыс орындарын құру картасы» және «10 мың тұрғынға – 100 жаңа жұмыс орны» мемлекеттік бағдарламасы негізінде жүзеге асырылуда. Аталған бастамалардың басты мақсаты – халықтың әл-ауқатын арттыру, өңірдегі жұмыссыздық деңгейін төмендету және еңбек нарығын тұрақтандыру.
Осы мәселелер Түркістан облысының әкімі Нұралхан Көшеровтің төрағалығымен өткен мәжілісте жан-жақты талқыланды. Жиында облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева «Жаңа жұмыс орындарын құру және халықты жұмыспен қамту» тақырыбында баяндама жасады.
Басқарма басшысының мәліметінше, 2025 жылы облыс бойынша жаңа жұмыс орындарын ашу және халықты еңбекке тарту бағытында нақты шаралар қабылданған. Бұл ретте ұлттық жобалар, мемлекеттік бағдарламалар және өңірлік даму жоспарларының шеңберінде іске асырылатын жобалар айқындалған.
Жиында облыс әкімі жұмыспен қамтудың барлық бағыттары бойынша белгіленген индикаторлардың уақытылы және сапалы орындалуын қамтамасыз етуді тапсырды.
– Жұмыспен қамту – басты міндет. Аудан, қала әкімдері белгіленген жоспарларды нақты орындауы қажет. Әсіресе тұрақты жұмыс орындарын ашуға ерекше көңіл бөлінуі тиіс. Инвестиция тарту арқылы жаңа жұмыс орындарының құрылуын қамтамасыз ету – экономикалық дамудың негізгі тетігі. 2021–2025 жылдарға арналған Даму жоспарының орындалуы тұрақты бақылауда болуы қажет, – деді облыс әкімі Нұралхан Көшеров.
Мәжілісте сондай-ақ Президент тапсырмасына сәйкес барлық аудан мен қалада «Отбасын қолдау орталықтарын» ашу және олардың жұмысын жүйелеу мәселесі қаралды. Әкім аталған орталықтардың әлеуметтік маңыздылығына тоқталып, тұрғындарға психологиялық, құқықтық және консультациялық көмек көрсету жұмыстарын күшейтуді тапсырды.
– Әрбір аудан мен қалада отбасын қолдау орталығының ашылуын шұғыл қамтамасыз ету керек. Бұл орталықтарда тұрмыстық зорлық-зомбылықтан зардап шеккендерге көмек көрсетіледі. Әкімдіктер осы бағыттағы жұмыстарды үйлестіріп, халықтың сеніміне ие болуы тиіс, – деді өңір басшысы.
Жиында халықты тұрақты жұмыспен қамту мәселесімен қатар, еңбек нарығындағы әділ төлемақы жүйесін қалыптастырудың да маңыздылығы атап өтілді. Тұрғындарға лайықты еңбекақы төлеу және қауіпсіз еңбек жағдайларын қамтамасыз ету – мемлекеттік саясаттың негізгі басымдықтарының бірі.
Биыл облыс бойынша білім беру, денсаулық сақтау және әлеуметтік салада жаңадан пайдалануға берілетін нысандарда тұрақты жұмыс орындары ашу жоспарланған. Сонымен қатар субсидияланған жұмыс орындарында тәжірибе жинаған азаматтар тұрақты еңбекке тартылмақ. Бұл шаралар еңбек нарығына қатысушылардың кәсіби бейімделуін арттырып, әлеуметтік қолдау жүйесін күшейтеді.
«Өңірлік жұмыс орындарын құру картасы» аясында әр аудан мен қала бойынша нақты жоспар бекітілген. Құжатта мемлекеттік бағдарламалар мен жеке инвестициялық жобалардың нәтижесінде ашылатын жұмыс орындарының саны, мерзімі және бағыты айқындалған. Бұл өз кезегінде жергілікті әкімдіктердің жұмысына айқын бағыт береді және жоспардың орындалуын тиімді бақылауға мүмкіндік жасайды.
Мәселен, биылғы жылы облыстағы құрылыс, ауыл шаруашылығы, өнеркәсіп және қызмет көрсету салаларында мыңдаған жаңа жұмыс орны ашылады деп күтілуде. Түркістан қаласында және өзге де аудан орталықтарында индустриялық аймақтар мен жаңа өндіріс нысандары іске қосылады. Әсіресе шағын және орта бизнес субъектілеріне жеңілдетілген несие беру, инфрақұрылымдық қолдау көрсету арқылы жаңа кәсіпорындар ашуға жағдай жасалуда.
Жаңа жұмыс орындарын ашу ісі тек мемлекеттік жобалармен шектелмейді. Қазіргі таңда облысқа инвестиция тарту, кәсіпкерлікті дамыту және ауыл шаруашылығын қолдау бағыттары арқылы да тұрақты жұмыс орындары құрылуда. Атап айтқанда, инвесторлар есебінен іске асырылып жатқан 200-ден астам жоба 10 мыңнан астам жаңа жұмыс орнын ашуға мүмкіндік бермек.
Мәжіліс барысында облыстық басқармалар мен аудан әкімдерінің есебі тыңдалып, жұмыстарды үйлестірудің тиімділігін арттыру шаралары талқыланды. Әр аудан мен қалада жұмыс орындарын ашу көрсеткіштерін нақтылау, әлеуметтік осал топтарды еңбекке тарту және халықтың табысын арттыру мақсатында арнайы жоспар әзірленіп, бекітілген.
Түркістан облысының жұмыспен қамтуды үйлестіру және әлеуметтік бағдарламалар басқармасының дерегінше, өткен жылы өңір бойынша 110 мыңнан астам адам жұмысқа орналастырылған, оның 65 пайызы тұрақты жұмысқа орналасқан. Ал биыл бұл көрсеткішті арттыру көзделіп отыр.
Облыс әкімі өз сөзінде халықты жұмыспен қамту мәселесі тек статистикалық көрсеткіш емес, әрбір тұрғынның өмір сапасын арттырумен тікелей байланысты екенін айтты.
– Әрбір аудан және қала әкімдері халықтың жұмыспен қамтылуына жеке жауапты. Бұл бағытта жүйелі бақылау орнатылып, нақты нәтижелерге қол жеткізу керек. Әсіресе жастар мен әлеуметтік осал топтардың еңбекке араласуына мүмкіндік жасау маңызды. Әрбір жаңа жұмыс орны – өңірдің дамуына қосылған үлес, – деді Нұралхан Көшеров.
Мәжілісте сонымен қатар халықты жұмыспен қамту орталықтарының қызметін жетілдіру, электрондық еңбек биржасын дамыту, кәсіби оқыту және қайта даярлау курстарының тиімділігін арттыру мәселелері қаралды. Қала және аудан әкімдеріне еңбек ресурстарының балансын жаңарту, жұмыссыз азаматтардың деректер базасын нақтылау және оларды сұранысқа ие мамандықтарға бағыттау тапсырылды.
Жиын қорытындысы бойынша облыс әкімі тиісті басқармалар мен аудан әкімдеріне халықты жұмыспен қамту бойынша бекітілген индикаторлардың орындалуын тұрақты бақылауда ұстауды тапсырды. Сонымен қатар әлеуметтік саладағы жаңа бастамаларды іске асыруда әрбір басшының дербес жауапкершілігі күшейтілетіні айтылды.
Халықты жұмыспен қамту – әлеуметтік тұрақтылық пен экономикалық дамудың негізгі тірегі. Осы бағыттағы шаралардың нәтижесінде Түркістан облысында жұмыссыздық деңгейін төмендету, еңбек нарығындағы теңгерімді сақтау және тұрғындардың табысын арттыру бойынша оң өзгерістер байқалуда.
Бүгінгі таңда өңірде еңбекке қабілетті халықтың 78 пайызы тұрақты жұмыспен қамтылған. Ал жаңа өндіріс орындарының, әлеуметтік нысандардың және инфрақұрылымдық жобалардың іске қосылуы бұл көрсеткіштің одан әрі өсуіне мүмкіндік береді.
Түркістан облысы алдағы уақытта да Мемлекет басшысының тапсырмаларына сәйкес жаңа жұмыс орындарын ашу және тұрғындарды нәтижелі жұмыспен қамту бағытындағы жұмыстарды жүйелі түрде жалғастыра бермек.
Жалпы, өңірде жүзеге асып жатқан әлеуметтік-экономикалық жобалар мен мемлекеттік бағдарламалар халықтың өмір сапасын жақсартуға, еңбек нарығын дамытуға және тұрақты табыс көздерін қалыптастыруға бағытталған.