Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауындағы басты бағыттардың бірі – қоғамда заң мен тәртіп идеологиясын терең орнықтыру. Президент әділет үстемдігі мен азаматтардың қауіпсіздігін қамтамасыз етуді мемлекеттің стратегиялық басымдығы ретінде атап өтті.
ҚОҒАМДАҒЫ ЗАҢ ЖӘНЕ ТӘРТІП – ТҰРАҚТЫЛЫҚ ПЕН ҚАУІПСІЗДІК КЕПІЛІ
Қасым-Жомарт Тоқаев атап өткендей, кез келген мемлекеттің тиімділігі оның азаматтарының әділдік пен қауіпсіздікке деген сұранысын қанағаттандыруымен өлшенеді. Бұл ұғымдар – тұрақтылық пен дамудың негізі.
Соңғы жылдары елімізде саяси және әлеуметтік-экономикалық реформалар ауқымды қарқынмен жүзеге асырылуда. Азаматтар өз пікірін ашық айтып, мемлекеттік шешім қабылдау процесіне тікелей араласуға мүмкіндік алды. Мұның бәрі ашық әрі әділ қоғам құруға бағытталған жаңа қоғамдық мәдениеттің қалыптасуына жол ашты.
ҚАРЖЫЛЫҚ ЖӘНЕ ЦИФРЛЫҚ САУАТТЫЛЫҚ – ҚҰҚЫҚТЫҚ ҚОРҒАНЫС НЫҒАЙТУЫНЫҢ БАСТЫ БАҒЫТЫ
Президент цифрлық дәуірдің жаңа сын-тегеуріндеріне назар аударып, алаяқтықтың жаңа түрлеріне қарсы күрестің маңыздылығын ерекше атап өтті.
Цифрлық технологиялардың кең таралуы қаржы алаяқтарының көбейіп, азаматтардың құқықтарына қауіп төндіріп отырғаны белгілі. Осыған байланысты қаржылық және цифрлық сауаттылықты арттыру – қоғамды қорғаудың тиімді тетігіне айналуы тиіс.
Осы бағытта «Amanat» партиясының «Қарызсыз қоғам» жобасы сәтті іске асуда. Өткен жылы 65 мың адам осы бағдарлама аясында қаржылық сауаттылық курстарынан өтті. Мектептер мен жоғары оқу орындарында қаржылық және цифрлық білім беру пәндерін енгізу де – уақыт талабы.
ҚҰҚЫҚ БҰЗУШЫЛЫҚТАРДЫҢ АЛДЫН АЛУ – БІРЛЕСКЕН ЖАУАПКЕРШІЛІК
Қасым-Жомарт Тоқаевтың тапсырмасымен «Құқық бұзушылықтардың алдын алу туралы» заң жобасы әзірленіп жатыр. Бұл құжаттың басты мақсаты – қылмыстың тамырын тереңнен кесіп, оның туындауына жол бермеу. Президент атап өткендей, бұл жұмыс тек құқық қорғау органдарының ғана емес, қоғам мен мемлекеттік аппараттың ортақ жауапкершілігіне айналуы тиіс.
Заң үстемдігін қамтамасыз ету – әділетті қоғам мен тұрақты мемлекеттің негізгі шарты. Сондықтан құқық қорғау органдары кәсібилік, батылдық және табандылық танытуы қажет.
ҚАУІПСІЗ ҚОҒАМ – ТҰРАҚТЫ ДАМУДЫҢ КЕПІЛІ
Мемлекет басшысы ел азаматтарының қауіпсіздігін қамтамасыз етуді стратегиялық басым бағыт ретінде айқындады.
Соңғы жылдары қоғамдық орындардағы қылмыс пен тәртіпсіздік азайып келеді. Дегенмен, заңсыздық пен ұсақ бұзақылыққа жол бермеу, вандализм мен шетелдіктердің заңсыз көші-қонына тосқауыл қою міндеті өзекті күйінде қалып отыр.
Президент Ішкі істер министрлігіне және жергілікті атқарушы органдарға қоғамдық тәртіпті нығайту мен қауіпсіздік деңгейін арттыру бойынша нақты тапсырмалар жүктеді.
Сондай-ақ, экстремизм мен радикализмнің кез келген түріне қатаң тосқауыл қойылуы тиіс екенін айтты.
ЖОЛ ҚАУІПСІЗДІГІ МӘСЕЛЕСІ – ҰЛТТЫҚ ДЕҢГЕЙДЕГІ МІНДЕТ
Президент қоғамда үлкен алаң тудырып отырған жол-көлік оқиғаларының көбеюіне тоқталып, жол қауіпсіздігін қамтамасыз етудің кешенді шараларын қабылдау қажеттігін атап өтті.
Жыл басынан бері жол апаттарынан 1300-ден астам адам қаза болып, 16 мыңнан астам азамат жарақат алған. Осыған байланысты Үкімет пен әкімдерге жол инфрақұрылымын жақсарту, интеллектуалды жүйелерді енгізу және жүргізушілерді даярлау сапасын арттыру тапсырылды.
ҚАРУЛЫ КҮШТЕРДЕГІ ТӘРТІП ПЕН ТӘРБИЕ – МЕМЛЕКЕТ АБЫРОЙЫ
Президент жастардың әскердегі қауіпсіздігіне айрықша назар аударды. Әскерге шақырылған сарбаздардың өмірі мен денсаулығы үшін жауапкершілік армия басшылығы мен құқық қорғау органдарының мойнында екенін ескертті.
«Жас сарбаздар өз борышын алаңсыз өтеуі үшін әскерде темірдей тәртіп орнауы керек», – деді Мемлекет басшысы.
ЕСІРТКІГЕ, ЛУДОМАНИЯҒА ЖӘНЕ ВАНДАЛИЗМГЕ ҚАРСЫ КҮРЕС
Қоғамның моральдық және рухани тазалығын сақтау – ұлттық қауіпсіздіктің бір бөлігі.
Президент есірткі саудасына және нашақорлыққа қарсы күресті күшейтуді тапсырды. Сонымен қатар вандализмге, құмар ойынға, электронды темекіге (вейпке) қарсы қабылданған заңдардың оң нәтижелер беріп отырғанын атап өтті.
Мұндай шаралар жастардың бойында парасаттылық, мәдениет және жауапкершілік құндылықтарын орнықтыруға бағытталған.
БІРЛІК, ТОЛЕРАНТТЫЛЫҚ ЖӘНЕ ЗАҢ ҮСТЕМДІГІ – ҚАЗАҚСТАННЫҢ МАҢЫЗДЫ ҚҰНДЫЛЫҚТАРЫ
Мемлекет басшысы Қазақстан халқының басты байлығы – бейбітшілік пен келісім екенін айтты.
Тіліне, дініне, ұлтына қарамастан, ешкімге қысым жасалмайтын ел болу – біздің ұстанымымыз. Сонымен қатар, Президент кейбір теріс пиғылды топтардың қоғамда іріткі салуға тырысатынын айтып, азаматтарды арандатушылыққа ермеуге және тек заңға сүйенуге шақырды.
БЕЙБІТ ДИПЛОМАТИЯ – ҚАУІПСІЗ ЕЛДІҢ СЫРТҚЫ САЯСАТЫ
Қазақстан бейбітшілік пен тұрақтылықты басты құндылық ретінде ұстанып келеді. Президент атап өткендей, еліміз халықаралық ұйымдармен ынтымақтастық орнатып, терроризмге, экстремизмге және заңсыз көші-қонға қарсы жаһандық күресте белсенді рөл атқарып отыр.
Біріккен Ұлттар Ұйымының бітімгерлік миссияларын қолдау және Азиядағы өзара іс-қимыл және сенім шаралары жөніндегі кеңестегі төрағалық – еліміздің жауапты әрі сындарлы сыртқы саясатының айқын дәлелі.
ҚОРЫТЫНДЫ
Мемлекет басшысы атап өткендей:
«Біздің қоғамымызда заң мен тәртіп үстемдік құруға тиіс. Бұл – бүкіл қоғамның және әр адамның қауіпсіздігін қамтамасыз етуге қатысты ең басты талап».
Әділетті, таза және қауіпсіз Қазақстанды құру – тек құқық қорғау органдарының емес, әрбір азаматтың ортақ парызы.
Заңға бағыну, мәдениеттілік және азаматтық жауапкершілік – ел тұрақтылығы мен ұлттық бірліктің берік негізі.