Ағымдағы жылдың 25 тамыз – 10 қыркүйек күндері аралығында Шымкент қаласының аумағында республикалық деңгейде өткізілетін “Абайлаңыз, балалар!” жедел-профилактикалық іс-шарасы өз жалғасын табуда. Бұл шараның негізгі мақсаты – жол қозғалысы қауіпсіздігін қамтамасыз ету, жол-көлік оқиғаларының алдын алу, жасөспірімдер арасындағы жарақат алу жағдайларын болдырмау, сондай-ақ балаларға жол жүру мәдениетін үйрету және жол ережелерін кеңінен насихаттау.
Аталған іс-шара аясында Шымкент қаласындағы барлық білім беру ұйымдарында балалардың жол қозғалысы ережелерін білу деңгейін арттыруға бағытталған лекциялар, семинарлар, тренингтер, дөңгелек үстелдер мен сауалнамалар ұйымдастырылып жатыр. Бұл – жасөспірімдердің құқықтық сауаттылығын арттырып, олардың жолда өзін қауіпсіз ұстауына мүмкіндік береді. Сонымен қатар, жергілікті полиция қызметі басқармасының инспекторлары оқушылармен тікелей профилактикалық жұмыстар жүргізіп, оларға жолдан дұрыс өту, бағдаршам мен жаяу жүргінші өткелін пайдалану, сондай-ақ велосипед, самокат және басқа да көлік құралдарын қауіпсіз басқару ережелерін түсіндіруде.
Құрметті ата-аналар! Бала қауіпсіздігі – ең басты құндылық. Балалар, ең алдымен, ата-ананың іс-әрекетіне қарап бой түзейді, сол себепті жолда өзіңіз үлгі көрсетіңіз. Балаңызға қарапайым жол қозғалысы ережелерін үйретіп, күнделікті тәжірибе арқылы қайталатып отыру – олардың өмірін сақтап қалудың басты кепілі. Оқу маусымының басталуымен бірге мектепке барып-келу кезінде қауіпсіз жүріп-тұру – күн тәртібіндегі өзекті мәселе. Сондықтан, балаларыңыздың мектепке апаратын және қайтатын бағыттарын бірге жүріп өтіп, қауіпті тұстарын көрсетіңіз, жол бойындағы белгілер мен бағдаршамның мәнін түсіндіріңіз.
Есіңізде болсын: бір сәттік салғырттық – орны толмас өкінішке соқтыруы мүмкін. Бала – біздің болашағымыз, оны қорғау – әрбіріміздің ортақ міндетіміз. Сақтық – қорғаныш негізі!
Іс-шара мерзімі: 25 тамыз – 10 қыркүйек, 2025 жыл
Ұйымдастырушы: Шымкент қаласы Полиция департаменті
Шара мақсаты: Жол-көлік қауіпсіздігін арттыру, балалар жарақатының алдын алу, жол ережесін насихаттау
Абай болыңыз – балаңызды сақтаңыз!
Шымкент қаласы Полиция Департаменті Еңбекші аудандық полиция басқармасы ескертеді!
