Бүгінгі цифрландыру мен жасанды интеллекттің дамуы қоғамға үлкен мүмкіндіктер сыйлағанымен, сонымен қатар жаңа қауіптерді де тудырып отыр. Қазіргі таңда алаяқтық іс-әрекетпен күнделікті кездесіп қалып жатамыз. Ал, сарапшылардың айтуынша, мемлекеттік құрылымдар мен қаржы секторына бағытталған кибершабуылдар жылдан-жылға артып келеді. Зиянкестер жасанды интеллектіні пайдалана отырып, шабуылдарын автоматтандырып, ауқымын кеңейте бастаған. Сондықтан киберқауіпсіздікке кешенді әрі жүйелі түрде қарау – уақыт талабы.
Осы өзекті мәселелер бүгін “Shymkent Hub” орталығында өткен «Цифрлық қауіпсіздік және сауаттылық» тақырыбындағы форумда талқыланды. Жиынға ІТ мамандар, стартап өкілдері және жастар қатысты. Шара барысында қатысушыларға заманауи қауіптен қорғану жолдары мен жеке деректерді қорғау мәдениетін қалыптастырудың маңызы түсіндірілді.
– Қазір әрбір азамат банк картасын пайдаланады, интернет арқылы сауда жасайды, түрлі қосымшаларға жеке мәліметтерін енгізеді. Осындай кезде қауіпсіздікті сақтамау үлкен шығынға әкелуі мүмкін. Қазір тіпті чат GPT кеңістігіне жеке мәліметтерді жіберу немесе мекеме құжаттарын жіберіп, бір шешім табу белең алып барады. Бұл өте қауіпті. Сондықтан цифрлық сауаттылықты арттыру – тек ІТ мамандардың емес, бүкіл халықтың міндеті болуы тиіс, – дейді хабтың резиденті Самал Райымжан.
Форум барысында жас мамандар жасанды интеллект дәуіріндегі жаңа қатерлерге қарсы тұрудың жолдарын ұсынып, азаматтарды киберқауіпсіздікті күшейтуге шақырды.
Цифрлық кеңістікте қауіпсіздік мәдениетін қалыптастыру тек техникалық шаралармен шектелмеуі керек. Бұл – әр азаматтың күнделікті әрекетіне айналуы тиіс дағды. Балалар мен жасөспірімдерден бастап, ересектерге дейін онлайн ортада өз мәліметтерін сауатты басқаруды үйреніп, күмәнді сілтемелер мен алаяқтық схемалардан сақтануды меңгеруі қажет. Осы бағыттағы үгіт-насихат пен білім беру жұмыстары үздіксіз жүргізілгенде ғана, цифрлық қауіптерге қарсы тиімді иммунитет қалыптастыру мүмкін болады.
Цифрлық қауіпсіздік – әр азаматтың жеке жауапкершілігіне айналуы тиіс маңызды дағды. Бұл саладағы білім мен сақтық – заманауи қоғамның басты қорғаны. Цифрлық ортада қауіпсіз болу үшін әр адам өз мәліметтерін қорғауды үйреніп, күмәнді әрекеттерден сақ болуға дағдылануы қажет. Бұл – замана талабына сай өмір сүрудің бір бөлігі.
Цифрлық қауіпсіздік – заман талабы
