Түркістан қаласында балаларға арналған жаңа қалалық оңалту орталығы жұмысын бастады. Ашылу рәсіміне ҚР Премьер-министрінің орынбасары Қанат Бозымбаев пен Түркістан облысының әкімі Нұралхан Көшеров қатысты.
Салтанатты шара барысында Премьер-министр орынбасары Мемлекет басшысы Қасым-Жомарт Тоқаевтың балалардың құқықтары мен денсаулығын қорғауға ерекше мән беретінін атап өтті. Оның айтуынша, жаңа орталық ата-аналар үшін – үміт, балалар үшін – жаңа мүмкіндік.
Өңір басшысы Нұралхан Көшеров та орталықтың өңірдегі балалар денсаулығын жақсартуға бағытталған маңызды қадам екенін айтып, демеушілік жасаған «YDA HOLDING» компаниясына алғысын білдірді. Нысан Кираз Арслан мен Яшар Деде Арсланның құрметіне салынған. Жобаның жалпы құны – 2,7 млрд теңге.
Орталықтың мүмкіндіктері
-
40 төсек-орын (стационар),
-
20 орын (амбулаторлық қабылдау),
-
Ғимарат ауданы: 2 227,41 шаршы м,
-
Аумағы: 1,56 гектар.
Мұнда ортопедиялық, нейрохирургиялық және кардиохирургиялық оталардан кейінгі оңалту, неврологиялық ауытқулар мен орфандық ауруларға арналған кешенді емдеу жүргізіледі. Орталық бүкіл Түркістан облысының балаларына қызмет көрсетеді.
Өңірдегі жағдай
Түркістан облысында 774 мыңнан астам бала (0–14 жас) тұрады. Соңғы бес жылда өңірде 300-ден астам әлеуметтік нысан салынды. Қазіргі таңда облыста 4 балаларды оңалту орталығы және 3 «Қамқорлық» орталығы жұмыс істейді. 2024 жылдың ішінде 14 153 бала оңалту көмегін алған.