Оңстүстік өңірде республикалық референдум өз мәресіне жетті. Түркістан облысының тұрғындары саяси науқанда ерекше ауызбіршілік танытып, дауыс беру көрсеткіші бойынша республикадағы көшбасшы аймақтардың біріне айналды. Түркістан облыстық аумақтық референдум комиссиясының төрағасы Аңсар Өсербаевтың мәлімдеуінше, өңірдегі сайлаушылардың келу көрсеткіші 84,03%-ды құрады. Облыста дауыс беру құқығына ие 1 187 257 азамат тіркелсе, бұл жалпы халық санының 55,4 пайызына тең. “Түркістан облысында дауыс беру процесі толықтай заң талаптарына сай, жоғары деңгейде ұйымдастырылды. Біздің басты мақсатымыз – әрбір азаматтың өз таңдауын еркін жасауына жағдай жасау болды. Өңір тұрғындары бұл саяси науқанға өте белсенді қатысты. Бұл халықтың еліміздің болашағына деген бейжай қарамайтынының, зор жауапкершілігінің айқын көрінісі,» — деп атап өтті Аңсар Жаңабайұлы.
Мерекелік атмосфера және ұлттық нақыш
Биылғы референдум Түркістан өңірінде тек саяси процесс қана емес, нағыз рухани мереке ретінде есте қалды. 947 учаскенің басым бөлігінде Наурыз мейрамының рухы сезіліп, ұлттық құндылықтар дәріптелді. Әжелер шашу шашып, ақсақалдар бата берген учаскелердегі көріністер сайлаушылардың көңіл-күйін көтеріп, жауапкершілік жүгін арттыра түсті.
Ерекше қажеттілігі бар жандарға – ерекше жағдай
Бұл науқанда облыс көлемінде мүгедектігі бар азаматтардың құқықтарын қорғау мен оларға қолайлы орта қалыптастыруға баса назар аударылды. Өңірде тіркелген 16 601 ерекше қажеттілігі бар дауыс беруші үшін барлық жағдай жасалды: — Қолжетімділік: Барлық 947 учаскеде пандустар орнатылып, тактильді жолақтар төселді. * Арнайы жабдықтар: Көру және есту қабілеті шектеулі жандар үшін құлаққаптар мен арнайы кабиналар дайындалды. * Сервистік қолдау: Референдум күні 170 инватакси қызметі мен 131 ымдау тілі маманы жұмылдырылды. * Цифрландыру: Барлық учаскелер «Қолжетімді орта» интерактивті картасына енгізіліп, кедергісіз қозғалыс қамтамасыз етілді.
Статистика мен фактілер
Өңірдегі саяси белсенділік аудандар кесіндісінде де айқын көрінеді. Сайлау учаскелері ең көп шоғырланған аймақтар: 1. Сайрам ауданы – 89 учаске; 2. Сарыағаш ауданы – 82 учаске; 3. Жетісай ауданы – 75 учаске; 4. Төлеби ауданы – 69 учаске; 5. Түркістан қаласы – 65 учаске. Сондай-ақ, биыл жас сайлаушылардың қатары айтарлықтай толықты. Бір жыл ішінде 18 жасқа толған 37 796 азамат алғаш рет өз таңдауын жасады. Ал тура референдум өткен 15 наурыз күні 135 тұрғын кәмелеттік жасқа толды. Қазіргі таңда облыстағы барлық учаскелер жұмысын аяқтап, дауыстарды санау процесі жүргізілуде”, — деді облыстық комиссия төрағасы Түркістан облысының 84,03 пайыздық көрсеткіші — бұл ел болашағына деген сенім мен жаңа белестерге деген дайындықтың айқын белгісі.