Сайрам ауданында биыл жалпы құны 44 миллиард теңгеге жуық 20-дан астам өндіріс орны ашылады. Аудан әкімдігі мен облыстық индустриялық-инновациялық даму басқармасының мәліметіне сәйкес, 2026 жылдың соңына дейін 43,9 млрд теңге көлеміндегі 21 инвестициялық жоба іске асырылып, нәтижесінде 1 232 адам тұрақты жұмыспен қамтылатын болады. Бұл көрсеткіш өңірдегі еңбек нарығын дамыту, жұмыссыздық деңгейін төмендету және әлеуметтік тұрақтылықты қамтамасыз ету бағытындағы нақты қадам болып отыр.
Ауданда бой көтеріп жатқан жобалардың ішінде «Kuzov Karabulak» ЖШС құрылыс жұмыстарының 95%-ға аяқталғаны айтарлықтай жетістік. Автобөлшектер өндіретін кәсіпорынның жалпы құны 2,5 млрд теңгені құрайды. Мұнда іске қосылғаннан кейін 500 жаңа жұмыс орны ашылады. Бұл жобаның жүзеге асуы ауданның өнеркәсіптік әлеуетін арттырумен қатар, жергілікті халықты тұрақты жұмыспен қамтуға және еңбек ресурстарын тиімді пайдалану арқылы әлеуметтік мәселелерді шешуге бағытталған.
Сайрам ауданы әкімінің Мадияр Оразалиевтің айтуынша, өткен жылы ауданда жалпы құны 30,3 млрд теңгені құрайтын 16 инвестициялық жоба іске асырылды, нәтижесінде 570 адам жұмыспен қамтылды. Атап айтқанда, «KAZ ECO MEAT» ЖШС заманауи ірі мал бордақылау алаңын іске қосып, жылына 5 мың бас ірі қара мал бордақылау және 10 000 тонна ет өндіру мүмкіндігіне ие болды. Сондай-ақ «MEAT MAGNAT» өндірістік кооперативі 10 000 басқа арналған заманауи мал бордақылау алаңы мен мал қалдықтарын өңдейтін цехты іске қосты. 2026 жылы ауданда «FATIMA MEAT MAGNATE» шаруа қожалығы 10 000 бас уақ мал бордақылауға арналған мал қора кешені мен мал сою алаңын, ал «BEK-AGRO.KZ» шаруа қожалығы 5 000 бас ірі қара мал бордақылауға арналған мал қора кешенін іске қосады. Бұл жобалар ауданның ет экспорттау әлеуетін одан әрі нығайтуға, өңір экономикасын әртараптандыруға және жұмыс орындарын көбейтуге мүмкіндік береді.
Өткен жылдың қорытындысы бойынша Сайрам ауданының жалпы өңірлік өнім көлемі 418,7 млрд теңгеге жетіп, өсім 31,2%-ды құрады. Ауыл шаруашылығында 158,3 млрд теңгенің өнімі өндіріліп, салаға 8,9 млрд теңге инвестиция тартылды. 2026 жылы ауыл шаруашылығындағы өнім көлемін 166,3 млрд теңгеге жеткізу жоспарлануда. Өңірде өнеркәсіп саласы да қарқынды дамуда: өткен жылы 86,3 млрд теңгенің өнімі өндірілсе, оның 78%-ы өңдеу өнеркәсібіне тиесілі болды. Биыл өнеркәсіп саласындағы өнім көлемін 96,6 млрд теңгеге жеткізу көзделген. Сонымен қатар, ауданда инвестициялар көлемі де артқан – 181,8 млрд теңге, өсім 2 есеге жеткен.
Сайрам ауданындағы инфрақұрылымдық дамудың нәтижесі де айтарлықтай. Ауданға қарасты 42 елді мекен 100% ауыз сумен қамтамасыз етілген. Электр желілерін жаңарту және тозығы жеткен желілерді қалпына келтіру жұмыстары жүргізілуде. Табиғи газбен қамтылу көрсеткіші 92,8%-ға жеткен. Асфальтталған жолдардың үлесі 79%-ды құрайды. Сондай-ақ аудан әкімдігі тұрғын үй мәселесін шешу мақсатында Қарасу ауылында жаңа мөлтек ауданды құруды қолға алды. 57 гектар аумақта 5 қабатты 47 тұрғын үй, ауыл әкімшілігі ғимараты және әлеуметтік нысандар салынады.
Жұмыс орындарын ашу мен өндірісті дамыту «Еңбек адамы» бейнесін дәріптеу, еңбек саласындағы саясатты нығайту және жұмысшы мамандықтары жылын тиімді жүзеге асыруға бағытталған маңызды шара болып табылады. Жаңа кәсіпорындарда жергілікті тұрғындарды жұмыспен қамту, әлеуметтік осал топтарды, жастар мен мүгедектерді еңбек нарығына тарту ерекше назарда. Субсидияланған және тұрақты жұмыс орындарын ашу арқылы аудан тұрғындары табысын арттырып, өмір сапасын жақсарта алады.
Аудандағы кәсіпорындар мен инвесторлар мемлекеттік қолдауды толық пайдаланады. Мәселен, өндірістік ғимараттарды жеңілдетілген шарттармен жалға алу немесе сатып алу мүмкіндігі, салықтық және кедендік жеңілдіктер, инфрақұрылыммен толық қамтамасыз ету сияқты тетіктер бар. Бұл шаралар «2029 жылға дейінгі халықтың кірісін арттыру бағдарламасын» іске асыруға және жергілікті халықты еңбекпен қамтуды арттыруға тікелей ықпал етеді.
Жаңа жобаларды іске қосу барысында кадрларды даярлаудың жаңа моделі де енгізілуде. Өндірістік кәсіпорындарда еңбек етуге жаңа мамандар тартылып, олар мансап орталықтары мен кәсіби оқу бағдарламалары арқылы даярланады. Бұл модель еңбек нарығында бәсекеге қабілетті мамандарды қалыптастыруға, тәжірибе жинауға және еңбек өнімділігін арттыруға бағытталған. Сонымен қатар, жастарды дуальды оқыту арқылы өндірістік процестерге араластыру, кәсіби дағдыларын жетілдіру және еңбек мәдениетін қалыптастыру қарастырылған.
Сайрам ауданында іске асырылып жатқан жобалар тек өндірісті дамытуға бағытталған жоқ. Олар еңбек қауіпсіздігін қамтамасыз ету, әлеуметтік кепілдіктерді нығайту, еңбек мәдениетін қалыптастыру, еңбексүйгіштікке баулу, әлеуметтік осал топтарды қолдау, көші-қон саясатын тиімді жүргізу және «Келешек» біріңғай ерікті жинақтау жүйесін енгізу сияқты әлеуметтік бағыттарды да қамтиды. Бұл шаралар ауданның әлеуметтік-экономикалық дамуына, тұрғындардың әл-ауқатын арттыруға және өңірдегі тұрақтылықты қамтамасыз етуге септігін тигізеді.
Ауданда ашылған өндіріс орындары тұрақты жұмыс орындарын қамтамасыз етіп қана қоймай, жергілікті тұрғындардың кәсіби әлеуетін арттыруға, тәжірибелік дағдыларын жетілдіруге, кәсіпкерлікті дамытуға және инвестициялық ахуалды жақсартуға мүмкіндік береді. Жаңа жобалар іске қосылғаннан кейін, ауданда 1 232 адам тұрақты жұмыспен қамтылып, экономикалық белсенді халықтың табысын арттыруға тікелей ықпал етеді.
Сайрам ауданының тәжірибесі – Түркістан облысында еңбек саласындағы саясатты дамытудың, жұмысшы мамандықтарын дәріптеудің, халықты жұмыспен қамтудың және әлеуметтік қамтамасыз етудің нақты үлгісі болып отыр. Жаңа өндіріс орындары мен инвестициялық жобалар халықты еңбекке баулу, кәсіби даярлық пен мансаптық өсуге мүмкіндік беру, сондай-ақ әлеуметтік әділеттілікті нығайту бағытындағы кешенді шаралардың көрінісі болып табылады.
Биыл іске қосылатын жобалар аудандағы өндіріс әлеуетін арттырумен қатар, еңбек нарығын тұрақтандыруға, жастар мен әлеуметтік осал топтарды жұмыспен қамтуға, экономикалық белсенділікті арттыруға, еңбек мәдениетін қалыптастыруға және халық табысын арттыруға мүмкіндік береді. Бұл бағыттағы жұмыстар Қазақстан Республикасының «Еңбек адамы» бейнесін дәріптеу, жұмысшы мамандықтары жылын өткізу, 2029 жылға дейінгі халық кірісін арттыру бағдарламасын іске асыру, кадрларды даярлаудың жаңа моделін енгізу, әлеуметтік кепілдіктерді нығайту және еңбек қауіпсіздігін қамтамасыз ету сияқты маңызды мемлекеттік бастамаларымен толық үйлеседі.