Сайрам ауданында қоғамдағы заң үстемдігін нығайту, азаматтардың құқықтық әрі қаржылық мәдениетін арттыру мақсатында ауқымды шаралар жалғасуда. Бүгін аудандық мәдениет үйінде Қазақстан Республикасы Қаржылық мониторинг агенттігінің Түркістан облысы бойынша Экономикалық тергеп-тексеру департаментінің бастамасымен республикалық деңгейде өткізіліп жатқан қаржылық қауіпсіздік диктантын насихаттауға бағытталған ақпараттық жиын өтті.
Іс-шараға аудан әкімдігі, құқық қорғау органдарының өкілдері, білім беру ұйымдарының қызметкерлері, кәсіпкерлер және жергілікті тұрғындар қатысты. Жиында қоғамдағы құқықтық мәдениетті қалыптастыру, заң талаптарын қатаң сақтау және азаматтарды қаржылық қауіптерден қорғау мәселелері егжей-тегжейлі талқыланды.
Сайрам ауданы әкімінің орынбасары Сержан Дүйсебаев өз сөзінде елімізде жүзеге асырылып жатқан құқықтық реформалар мен қоғамдық қауіпсіздікті қамтамасыз ету шараларының маңыздылығын атап өтті. Ол азаматтардың қаржылық сауаттылығын арттыру – замана талабы екенін атап өтіп, мұндай бастамалар мемлекет тұрақтылығы мен елдің экономикалық қауіпсіздігі үшін аса маңызды екенін жеткізді.
Қаржы нарығындағы алаяқтық схемалар мен заңсыз әрекеттердің алдын алу бүгінде күн тәртібінен түспейтін өзекті мәселелердің бірі. Жиын барысында мамандар қазіргі заманғы қаржылық қауіптер, банк карталары мен жеке деректерді қорғау тәсілдері, интернет-алаяқтықтың түрлері мен олардан сақтану жолдары туралы толыққанды ақпарат берді.
Республикалық диктанттың негізгі мақсаты – азаматтардың қаржылық сауаттылығын арттыру, оларды күмәнді қаржылық ұсыныстар мен инвестициялық жобалардан сақтандыру, сонымен бірге қоғамда құқықтық жауапкершілік пен қаржылық тәртіпті нығайту. Шара барысында мектеп оқушыларының, колледж студенттерінің, педагогтердің, мемлекеттік қызметкерлердің және жеке сектор қызметкерлерінің диктантқа онлайн форматта қатыса алатыны айтылды.
Диктантқа қатысу оңай әрі қолжетімді: онлайн платформада тіркеліп, 25 минут ішінде 20 сұраққа жауап беру ұсынылады. Нәтижесінде қатысушылар өз қаржылық білім деңгейін бағалап, алдағы уақытта қандай бағыттарда білімін жетілдіру қажет екенін анықтай алады.
Жиында құқықтық сананы қалыптастыру, жастар арасында қаржылық мәдениетті дамыту, сыбайлас жемқорлыққа қарсы күрес мәдениетін нығайту мәселелері де сөз болды. Қатысушылар заң талаптарын сақтау, азаматтық жауапкершілікті сезіну және қоғам игілігі үшін белсенді болудың маңыздылығын атап өтті. Құқық қорғау органдарының өкілдері тұрғындарға қаржылық алаяқтық фактілеріне тап болған жағдайда бірден құқық қорғау органдарына жүгіну қажеттігін ескертті.
Бүгінде қаржылық сауаттылық – тек жеке тұлғаның жеке қауіпсіздігі ғана емес, мемлекет қауіпсіздігінің де маңызды бөлігі. Сондықтан мемлекеттік органдар, білім беру мекемелері және қоғам белсенділері тарапынан бұл бағыттағы жұмыстар жүйелі түрде жалғасуда.
Шара соңында аудан басшылығы барлық мекемелер мен ұйымдарды азаматтардың құқықтық білімін көтеруге, жастарды адалдыққа, тәртіпке және заңды құрметтеуге баулуға шақырды. Сайрам ауданы әкімдігі мен құқық қорғау органдары қаржылық сауаттылық пен құқықтық мәдениетті дамыту бағытындағы ақпараттық-түсіндіру жұмыстарын алдағы уақытта да тұрақты түрде жүргізетінін айтты.