Шардара көпсалалы колледжінде «Мен өз мамандығыммен мақтанамын!» атты патриоттық және кәсіби-танымдық іс-шара өтті. Іс-шараның мақсаты — жастар арасында еңбек қадірін арттыру, жұмысшы мамандықтарының беделін көтеру, сондай-ақ студенттердің өз таңдаған кәсібіне деген сүйіспеншілігін қалыптастыру болды.
Мемлекет басшысы Қасым-Жомарт Кемелұлы Тоқаевтың бастамасымен 2025 жыл «Жұмысшы мамандықтар жылы» деп жарияланғаны белгілі. Бұл бастама — қоғамдағы еңбек адамының мәртебесін көтеріп, еліміздің экономикалық және әлеуметтік дамуына үлес қосатын білікті мамандардың жаңа буынын тәрбиелеуге бағытталған.
Осы мақсатта ұйымдастырылған іс-шара барысында колледж студенттері өз мамандықтарының қыр-сырымен бөлісіп, таңдаған салаларының қоғам өміріндегі маңыздылығын көрсетті. Әр мамандық иесі өз жұмыс бағытына қатысты бейнероликтер, көрмелік материалдар мен жобаларын ұсынды.
Сондай-ақ шарада үздік студенттер мен белсенді ұстаздарға алғыс хаттар мен марапаттар табысталды.
Колледж директорының орынбасары жастарға арнап:
«Бүгінгі таңда ел дамуының негізгі күші – білімді де еңбекқор жастар. Өз мамандығыңды сүйіп, кәсібіңді жетік меңгеру – табысты өмірдің кепілі. Әр мамандық қадірлі, ал оны абыроймен атқару – азаматтық парыз», – деп атап өтті.
Іс-шара студенттер арасында еңбекке деген құрметті арттырып, мамандықты сүю, шығармашылықпен жұмыс істеу, жеке дамуға ұмтылу идеяларын дәріптеді.
Шара соңында қатысушылар:
«Біз – еліміздің болашағын жасайтын еңбек майталмандарымыз! Өз мамандығымызды мақтан тұтамыз!» – деген ұранмен іс-шараны қорытындылады.