Мемлекет басшысы Ұлытау облысының әкімін қабылдады.
Дастан Рыспеков Президентке облыстың дамуы туралы есеп беріп, алдағы жоспарын таныстырды.
Негізгі мәліметтер:
1) 2024 жылы өнеркәсіп өндірісі 8%, құрылыс көлемі 28%, тұрғын үйді пайдалануға беру 30% өскен.
2) Былтыр Ұлытау өңіріне 226 млрд теңгеден астам инвестиция тартылған. Оның 89% – жеке инвестиция.
3) Биыл 17 жобаны іске асыру жоспарланып отыр. Олардың құны – 138 млрд теңге.
4) Өңірде инвестиция салуға айтарлықтай тартымды деп танылған салалар: құрылыс, сауда, логистика, энергияның балама көздері және туризм.
Облыс әкімі «Қазақмыс» корпорациясының кенішінде таяуда болған апат салдарынан қаза тапқан шахтерлердің отбасыларына көмек көрсетіліп жатқаны туралы айтты.
Қасым-Жомарт Тоқаевтың облыс әкіміне тапсырмалары:
— бизнестің әлеуметтік жауапкершілігін арттыру үшін жер қойнауын пайдаланушы ірі компаниялармен жұмысты жалғастыру;
— көлік-логистика әлеуетін арттыру;
— инфрақұрылымды жаңғырту;
— сапалы медициналық қызмет көрсету;
— халықты таза ауызсумен қамтамасыз ету;
— экологиялық мәселелерді шешу.