Мемлекет балалардың сапалы білім алуына және болашағына тұрақты қаржылық негіз құру мақсатында «Келешек» бірыңғай ерікті жинақтау жүйесін енгізуде.
Жаңа жүйе мемлекеттен бастапқы білім беру капиталы, жыл сайын төленетін мемлекеттік сыйлықақы және инвестициялық табыс көзделген жинақтау тетігін қамтиды.
Бастапқы білім беру капиталы
Біржолғы бастапқы білім беру капиталы 2025 жылдан бастап 5 жасқа толатын балаларға төленеді.
Бұл қаражаттың мөлшері мен есептеу тәртібі Ғылым және жоғары білім министрлігі бекітетін бастапқы білім беру капиталын есептеу, пайдалану және қайтару қағидаларына сәйкес айқындалады.
Мемлекеттік сыйлықақы және жинақтау тетігі
«Келешек» жүйесі қолданыстағы Мемлекеттік білім беру жинақтау жүйесімен (МБЖЖ) біріктіріле іске асады.
Жүйе аясында жыл сайын:
-
барлық балалар үшін 5% мөлшерінде мемлекеттік сыйлықақы,
-
халықтың әлеуметтік осал топтарына жататын балалар үшін 7% мөлшерінде мемлекеттік сыйлықақы төленеді.
Осылайша, ата-аналар мен мемлекет бірігіп, баланың болашағына арналған қаржыны тиімді жинақтай алады.
Жинақталған қаражатты келесі мақсаттарға пайдалануға мүмкіндік беріледі:
-
техникалық және кәсіптік білім алу,
-
жоғары оқу орнында оқу,
-
жоғары оқу орнынан кейінгі білім алу,
-
тұрғын үй жағдайын жақсарту.
Креативті индустрияны қолдау шаралары
Түзетулердің екінші блогы елдегі креативті индустрияны дамыту мәселелерін қамтиды.
Жоспарға сәйкес, әр облыс орталығында және ірі қалаларда креативті индустрия орталықтары құрылады. Бұл орталықтар шығармашылық сала өкілдеріне өз өнімдерін коммерцияландыру және нарыққа шығару тұрғысынан қолдау көрсетеді.
Сонымен қатар, «Креативті индустрияларды қолдау қоры» атты арнайы заңды тұлға құрылады.
Қордың негізгі міндеттері:
-
шығармашылық таланттарды іздеу және насихаттау;
-
креативті жобаларды коммерцияландыруға жәрдемдесу;
-
отандық креативті өнімдерді халықаралық нарықтарға шығару.
Мемлекеттік саясат және уәкілетті органдардың рөлі
Креативті индустрияны дамыту саласында Мәдениет және ақпарат министрлігі уәкілетті орган ретінде белгіленеді.
Министрлікке саланы ынталандыру және мемлекеттік қолдау көрсету қағидаларын әзірлеу және бекіту құзыреті беріледі.
Ал облыстардың, республикалық маңызы бар қалалар мен астананың жергілікті атқарушы органдары өз өңірлерінде креативті индустрия саласындағы мемлекеттік саясатты іске асырумен айналысады.