«Адал азамат» біртұтас тәрбие бағдарламасы аясында «Отырар» жалпы білім беретін мектебі тәлімгері Ф.Төлеген ұйымдастырған «Қыз бала психологиясы» атты тренинг қыз балалардың ішкі жан дүниесін тереңірек түсініп, өз ойларын ашық білдіру, бойларындағы сенімділікті арттыру мақсатында өткізілді. Бұл шараның басты мақсаты – гендерлік теңдікті нығайту, қыз балаларға өз құқықтарын түсіндіріп, оларды өз-өзін құрметтеуге және тұлғалық дамуына ықпал ету болды.
Қазіргі заманғы қоғамда қыз балаларға қатысты көптеген стереотиптер мен күтілімдер бар, бірақ әрбір қыздың өз ерекшеліктері мен өмірлік ұстанымдары бар. Осы тұрғыдан алғанда, тренингтің алғашқы бөлімі «Ой толғау» өте маңызды рөл атқарды. Бұл бөлімде қыз балалар өздерінің эмоциялық тұрақтылығын, өзін-өзі бағалау деңгейін және мінез-құлық ерекшеліктерін талқылады. Қатысушылар қыз бала болмысы, өзіне деген сенім, қазіргі замандағы қыз тәрбиесі, сондай-ақ қоғамдағы қыз баланың рөлі туралы өз ойларын бөлісіп, пікір алмасу арқылы жеке тұлғалық дамуға жол ашты.
Қыз балалардың ішкі әлемін түсіну және оларды жан-жақты қолдау қазіргі кезеңде аса маңызды болып табылады. Өйткені, қыздардың әлеуметтік жағдайы мен болашаққа деген көзқарасы көбінесе отбасындағы тәрбие мен мектептегі білім беру үрдісіне байланысты. Тренинг барысында олардың өзін-өзі тану, болашақтағы мақсаттар мен армандарға деген сенімдерін қалыптастыру үшін түрлі жаттығулар ұсынылды. Әрбір қыз бала өз жүрегіндегі армандар мен ішкі толғаныстарын ашық айтып, өз-өзін түсінуге және әлемге деген көзқарасын кеңейтуге мүмкіндік алды.
Интерактивті тапсырмалар мен психологиялық тесттер арқылы қыз балалар мінез-құлық ерекшеліктерін, эмоцияны басқару қабілетін анықтап, өзіндік тұлғалық қасиеттерін бағалай білді. Wordwall платформасы арқылы өткізіліп жатқан психологиялық ойын элементтері тренингке ерекше серпін беріп, қатысушылардың белсенділігін арттырды. Бұл жаттығулар қыз балаларға өз сезімдерін тануға, оларды дұрыс басқаруға және жан дүниесін түсінуге көмектесті.
Тренингтің ерекше кезеңдерінің бірі – жағдаяттық сұрақтар болды. Қатысушылар өмірлік дағдыларын сынап, қиын жағдайларды шешу жолдарын талқылады. Мұндай тәсіл қыздардың өмірлік тәжірибелерін арттырып, олардың өмірге деген жауапкершілік сезімін нығайтуға, қоғамдағы қыз балалардың құқықтары мен мүмкіндіктерін толық түсінуге мүмкіндік береді. Жағдаяттық сұрақтар қыздар арасында пікірталас тудырып, өзара құрмет пен түсіністікке негізделген пайдалы диалог қалыптастырды. Бұл бөлім әлеуметтік тұрғыдан да маңызды: қыз балаларды өз пікірін білдіруге және ойлау қабілеттерін дамытып, қоғамдағы гендерлік теңдік мәселелерін талқылауға ықпал етеді.
Шараның соңында өткізілген «Тілек алаңы» қатысушылардың бір-біріне жүректен шыққан жылы сөздер мен шабыт беретін тілектер жазып қалдыруы тренингтің позитивті атмосферасын одан әрі арттырды. Бұл бөлім қыздар арасындағы достықты нығайтып, бір-біріне деген сенімділікті, қолдау сезімін арттыруға бағытталды. Қыз балаларға өзара қолдау көрсету, бір-бірін тыңдау және құрметтеу – бұл гендерлік теңдік принциптерін қалыптастыруға, әлеуметтік ортада қыздардың рөлін арттыруға септігін тигізеді.
Жалпы, тренингтің басты мақсаты — қыз балаларға өз-өздеріне сенімді болуға, жан дүниесін терең түсінуге және өмірде кездесетін қиындықтарды жеңе білуге бағытталды. Бұл шара, сонымен қатар, қыз баланың құқықтарын қорғауға, олардың әлеуметтік орталарда белсенді болуына және болашақта қоғамның толыққанды мүшесі ретінде дамуына үлес қосады.
Қазіргі таңда гендерлік теңдік мәселесі тек мемлекеттік деңгейде ғана емес, әрбір отбасы мен білім беру ұйымдарында да үлкен маңызға ие. Мұндай тренингтер қыз балаларға өздерін тыңдап, дамытуға, құқықтарын қорғай отырып, жан-жақты қалыптасуына мүмкіндік береді. Ал бұл өз кезегінде ана мен баланы қорғау, олардың қоғамдағы орны мен рөлін нығайту жөніндегі саясаттың іске асуына ықпал етеді.