1 қыркүйек – Білім күніне орай Еңбекші ауданының барлық мектептерінде дәстүрлі Алғашқы қоңырау соғылды.
Бұл ерекше күнде Еңбекші аудандық полиция басқармасының бастығы, полиция подполковнигі Жандос Бейсенов №36 мектепке арнайы барып, ұстаздарды, оқушыларды және олардың ата-аналарын жаңа оқу жылымен шын жүректен құттықтап, оларға табыс пен сәттілік тіледі. Сонымен бірге, бастауыш сынып оқушыларына балаларға арналған арнайы ойыншық полиция көліктері табысталып, жол жүрісі ережелерін сақтаудың маңыздылығы жайлы еске салынды.
Айта кету керек, басқарма бастығының орынбасарлары Б.Сағынбаев пен Е.Жумабаев аудан аумағындағы басқа мектептерге барып, бастауыш сынып оқушыларына сый-сияпаттар үлестірді.
Жасөспірімдердің қауіпсіздігі – полиция қызметкерлерінің басты назарында. Олар балалардың мектепке келіп-кетуінде, жолда және қоғамдық орындарда қауіпсіздікті қамтамасыз ету үшін жүйелі түрде профилактикалық жұмыстар жүргізуде. Бұл бағытта тәртіп сақшылары ата-аналар мен мұғалімдерге арнайы кеңестер беріп, балаларға жол қозғалысы ережелерін сақтау қажеттігін түсіндіреді. Әсіресе, жаяу жүргінші өткелдерін дұрыс пайдалану, бағдаршамның түсіне мән беру және жолда абай болу сияқты қарапайым, бірақ маңызды қағидаларды насихаттау жұмыстары жүргізіледі.
Полиция өкілдері балалардың қауіпсіздігін қамтамасыз ету – тек тәртіп сақшыларының ғана емес, бүкіл қоғамның ортақ міндеті екенін атап өтті. Ата-аналар, мұғалімдер және жүргізушілер балалардың жолдағы қауіпсіздігін қадағалап, жауапкершілік танытса, жаңа оқу жылы балалар үшін табысты әрі қауіпсіз болады.
Мектептерде өткізілетін осындай іс-шаралар балаларға құқықтық тәрбие беру мен қауіпсіздік мәдениетін қалыптастыруда маңызды рөл атқарады. Полицияның қатысуымен ұйымдастырылған кездесулер мен акциялар жас ұрпақтың жолдағы тәртібін жақсартуға, құқық бұзушылықтарды азайтуға және қоғамдағы сенімділікті арттыруға ықпал етеді. Осылайша, тәртіп сақшылары мен білім беру мекемелері бірлесіп, балалардың қауіпсіздігі мен олардың құқықтық сауаттылығын арттыруға барынша көңіл бөлуде.
Жалпы, білім күні – балалардың жаңа білім алу жолындағы алғашқы қадамы ғана емес, сонымен бірге олардың амандығын қорғау, жол қауіпсіздігі мәдениетін қалыптастырудың да бастамасы болып саналады. Еңбекші ауданы полициясы осы бағыттағы жұмысты әрі қарай да жалғастыра бермек.
Білім күні мен балалар қауіпсіздігіне арналған ерекше шаралар
